स्वर सम्राट नारायण गोपालको २५ औं स्मृतिमा रोल्पामा नारायण गोपालका गीतहरु गुञ्जिएका छन् । जिल्लाका केही उत्साहित युवा गायकहरुले नारायण गोपालका चर्चित गीतहरु सुनाएका हुन् । शनिबार लिबाङको वाचानालयमा आयोजित कार्यक्रममा नवीन लोचनमगर, सागर अविरल जिसी, कर्ण खड्का र अमरजित पुनमगरले नारायण गोपालका विभिन्न गीतहरु प्रस्तुत गरेका थिए ।
त्यस्तै कोमलसरी जिसी र लोक आलोकले समेत गीत प्रस्तुत गर्नुभएको थियो । कार्यक्रममा स्वर सम्राट नारायण गोपालको तस्वीरमाथि टिका लगाई श्रद्धाञ्जली गरिएको थियो । हार्मोनियम र गीतारको माध्यमबाट प्रस्तुत गरिएका नारायण गोपालका कालजयी गीत सुन्न जिल्लाका कलाकार, साहित्यकार तथा पत्रकारहरुको उल्लेख्य सहभागिता रहेको थियो ।
गायकहरुले नारायण गोपालका ‘एउटा मान्छेको ...., म त लाली गुराँस भएछु ..., दुइटा फूल देउरालीमा..., केही मिठो ..., पर्खिबसेँ ..., यति धेरै ..., झरेको पात ..., वनै खायो डढेलोले ...’ लगायतका थुप्रै गीतहरु सुनाएका थिए । कार्यक्रममा सहभागिहरुले यसप्रकारको कार्यक्रमले पूराना स्रष्टाको सम्मान हुनुका साथै कलाकारहरुमा नयाँ जागरण आउने प्रतिक्रिया दिएका थिए ।
Post a Comment