२२ मंसिर । जिल्लामै ठूलो क्लवको रुपमा स्थापित सनस्टार युवा क्लव रोल्पाले आफ्नो दोस्रो वार्षिक उत्सव यही फागुनको ५, ६ र ७ गते गर्ने निर्णय गरेको छ । क्लवले वार्षिक उत्सवको अवसरमा विभिन्न खेलकुद तथा मनोरञ्जनात्मक कार्यक्रमहरुको समेत आयोजना गर्ने भएको छ ।
जसमा जिल्ला स्तरिय फूटबल प्रतियोगितालाई मूख्य आकर्षणको रुपमा लिने बताइएको छ । क्लवका अध्यक्ष पूर्ण केसीको अध्यक्षता र सञ्चालक समितिका पदाधिकारीहरुको उपस्थितिमा शनिबार रोल्पाको लिबाङमा बसेको बैठकले उक्त निर्णय पारित गरेको हो ।
सनस्टार युवा क्लव अन्तरगतको सनस्टार राष्ट्रिय साप्ताहिकको पहिलो वार्षिक उत्सव पनि सोही समयमा मनाउने निर्णय भएको छ । पत्रिकाको वार्षिक उत्सवका अवसरमा वार्षिक समिक्षा कार्यक्रम सहित पत्रकार, साहित्यकार, कलाकार, राजनैतिक दल, सरकारी तथा गैर सरकारी निकायका प्रतिनिधिका बीचमा मैत्रीपूर्ण फूटबल प्रतियोगिताको समेत आयोजना गर्ने निर्णय भएको छ ।
बैठकले वार्षिक उत्सवमा मैत्रीपूर्ण फूटबल प्रतियोगिता, जिल्ला स्तरिय पुरुष फूटबल प्रतियोगिता, लोकदोहोरी प्रतियोगिता लगायतका कार्यक्रमहरुको आयोजना गर्ने निर्णय गरेको छ । साथै सोही अवसरमा बक्सिङ, कराँते, टेक्वान्डो, बृहत साँस्कृतिक तथा साङ्गीतिक कार्यक्रमको प्रस्तुति समेत रहने बताइएको छ ।
कार्यक्रम सफल बनाउनको लागि जिल्लामा रहेका रेडियो जलजला र रोल्पा समाचार साप्ताहिकलाई मिडिया पार्टनरको लागि अनुरोध गर्ने लगायतका निर्णय गरिएको अध्यक्ष पूर्ण केसीले जानकारी दिनुभयो ।
Post a Comment