मंसिर १, रोल्पा ।
नेकपा एमालेका पोलिटव्यूरो सदस्य एवम् पूर्व भूमिसुधार मन्त्री दलबहादुर रानाले अहिलेको सत्ता गठबन्धनले संविधान संशोधनको कुरा ल्याएर टाउको दुखेको औषधी खुट्टामा लगाउन खोजेको आरोप लगाएका छन् । झापा, मोरङ तथा कैलाली, कन्चनपूरको विषयमा केही असन्तुष्टि रहेको भएपनि त्यहाँ विषयलाई सम्बोधन गर्नुको साटो ५ नं. प्रदेश टुक्र्याउन खोजेको आरोप लगाए । ‘विवादै नभएको ठाउँमा संशोधन कसरी आयो ?’ नेता रानाले सत्तारुढ दलहरुलाई प्रश्न गरे । अंगीकृत नागरिकता, सीमा हेरफेर लगायतका कुरासहित संविधान संशोधनको प्रस्ताव संसदमा गए कांग्रेस माओवादीकै सांसदहरुले विरुद्ध भोट गर्ने ठोकुवा गरे ।
प्रेस चौतारी रोल्पाले रोल्पाको लिबाङमा गरेको पत्रकार भेटघाटमा उनले यस्तो बताएका हुन् । संविधान गतिशिल दस्तावेज भए पनि अहिले चर्चा भएका कुरा संशोधनका विषय नभएको र त्यसमा एमालेको शतप्रतिशत विरोध रहेको बताए ।
मधेसको नामबाट भारतलाई रिझाउने खेल
सांसद वैजनाथ चौधरीले अंगीकृत नागरिकता भनेको विदेशीलाई दिने नागरिकता भएको तर्क गर्दै यस्तो व्यवस्था कुनै देशमा नरहेको दावी गरे । अहिलेको चलखेल मधेसी नामबाट भारतलाई रिझाउने काम भइरहेको उनको आरोप छ । मधेसीहरुले नेपाल बहुराष्ट्रिय मुलुक भनेर अपव्याख्या गरेको भन्दै सांसद चौधरीले बहुधार्मिक, बहुजातिय, बहुभाषिक देश भएको तर्क गरे । ‘मधेस एउटा राष्ट्र हो भन्ने मधेसीहरुको बुझाई छ’ सांसद चौधरीले भने ‘यस्तो अपव्याख्यामा एमाले सहमत छैन ।’
उनले ५ नं. प्रदेश टुक्र्याउन तराइकै जनता तयार नभएको दावी गरे । त्यस्तै एमाले युवा नेतृ रचना खड्काले राज्यका सबै तहमा ४० प्रतिशत महिला सहभागीताका लागि नेकपा एमाले अगाडि बढेको बताए । जीवन डाँगीको अध्यक्षतामा भएको कार्यक्रमको सञ्चालन दिलिप कुवरले गरेका थिए ।
Post a Comment